Gen 46 | TVK | STEP | Misak ni Siekob mileh ngenen xil e ba ladi Bersiba diamu. E rute nen ak, xi misa sanien eo xil mi Hi xa tamen Aesak di temot mini.

Genesis 46

Siekob Be Hal Isip Del Vatimol Nan Xil e Hi Pol ni Xil Mei Labe Holu

Senesis 46:1-7, 28-30; 47:27-28

1 Misak ni Siekob mileh ngenen xil e ba ladi Bersiba diamu. E rute nen ak, xi misa sanien eo xil mi Hi xa tamen Aesak di temot mini. 2 E vongien, Hi misepin mini nggo metuveen tei bit, “!Siekob! !Siekob!”

Ma Siekob bit, “O-o, inou iaxale.”

3 “Inou Hi xa tamom di temot mini. Ulum nakan ti tengan ha uhe hal Isip. Vengan e rute ak, inou nipol ni vatimol nam xil mei lihe kantri tei xa eilep. 4 Inou niha itelak e nisikoe xolok e suse nam tengan ha uti e hal Isip. Itutou ni, inou nileh rilomun ni vatimol nam xil limei inggak. E melele xa umat, Siosep iaxa ite visaluk e ipis xol tenbom.”

5 Melele xa Siekob mea reling ut Bersiba, horamue nan xil lalingi del horamue e atou nae xil e kat xil xa mahulong xa hos xil lalihi xa suv toto tahal Isip temaen ni mi xil. 6 Xil lateleh vongoro sae xil e holesok nae xil mun xa latelehi e melele xa lateti e kantri tahal Kenan. Siekob be hal Isip del vatimol xil vus nan. 7 Reitin, ba del xat natneli xil, natnahin xil, havneli xil del havnahin xil mun.

28 Siekob misil Sudah diamu ba tengan ihiteni mi Siosep mei ihisu mini e tan tahal Kosen. Melele xa laduxoh rute ak, 29 Siosep but be kat te hos e miloh be ut Kosen tengan vahisu mi tamen. Melele xa mei lubisu, xalu lupo xat xalu e Siosep midang be nousav. 30 Siekob biteni mini bit, “Xos vahit namat xosali, inou namat vatel tomat, vengan napusuk mun ni metok xa xouk omeul li tang oda.”